Выбарчы ўчастак №2 у Карэліцкім раённым Цэнтры культуры і народнай творчасць пачаў сваю працу 22 лютага ў 10:00. Яшчэ да адкрыцця ўчастка каля дзвярэй выстраілася чарга з жадаючых прагаласаваць. Першай свой голас за прыняцце абноўленага праекта Канстытуцыі Рэспублікі Беларусь аддала Таіса Шэўка:

– Я прыйшла на рэферэндум, каб аддаць свой голас «за» змены ў Канстытуцыі. У нашым асноўным Законе адлюстроўваецца самае важнае – клопат пра народ, захаванне гісторыі нашай дзяржавы. Я аддаю свой голас за Беларусь, за мір і за свой народ. Для мяне важна, каб нашы грамадзяне былі ўпэўнены ў заўтрашнім дні.

За паўгадзіны зала ўчастка сабрала больш за 30 удзельнікаў рэферэндуму, камісія таксама прыняла некалькі званкоў з просьбай прагаласаваць дома.

Марыя Хвасько, пенсіянер:

– Я ўпэўнена, што прыйсці на рэферэндум павінен кожны грамадзянін, бо ад нас залежыць будучыня краіны. Я галасую не проста за змены ў Канстытуцыі, я галасую за бясплатную медыцыну, за даступную адукацыю для нашых дзяцей і ўнукаў, за сацыяльную падтрымку, за захаванне традыцыйных каштоўнасцяў і, галоўнае, за захаванне памяці і праўды аб Вялікай Айчыннай вайне, аб генацыдзе беларускага народа і тым, што адбывалася на тэрыторыі нашай Беларусі. Мая сям’я перажыла многае ў тыя гады: дзед загінуў на фронце, маці падлеткам забіралі ў Германію, бацька служыў з 1940 па 1946 гады. Я захоўваю гэтую памяць і жадаю, каб будучыя пакаленні не паўтаралі такой страшнай вайны.

Ніна і Мікалай Яфрэмавы, пенсіянеры:

– Нягледзячы на наш узрост, мы людзі прагрэсіўныя, стараемся сачыць за ўсімі актуальнымі навінамі, чытаем нашу раёнку і рэспубліканскія выданні. Мы азнаёміліся з новым праектам Канстытуцыі ад коркі да коркі, параўналі ўсе пункты з дзеючым дакументам. Над гэтым праектам працавалі вельмі граматныя людзі, юрысты, палітолагі. У ім усё вельмі прадумана і правільна. Мы «за» абноўленую Канстытуцыю. Для нас вельмі значным абнаўленнем стала захаванне гістарычнай праўды і памяці, лічу, наша моладзь павінна ведаць праўду і берагчы мірнае неба. Наша дзяржава заўсёды аказвае падтрымку пенсіянерам, сем’ям, моладзі. Для іх ёсць даступная адукацыя, гарантаванае першае месца працы. Без такой падтрымкі Беларусь ужо немагчыма ўявіць.